Oso ohikoa da neskek zein mutilek amets erotikoak edukitzea, halere, sarritan lotsatu egiten gara gure bikotea ez den batekin edo eduki erotikoa duen egoera batekin amets egiten dugunean.
Baina zein da amets erotikoen esanahia? Zerbait gertatuko denaren seinale dira amets hauek? Sexuan eragin negatiboa izan dezakete?
Amets erotiko arruntenek badute esanahi edo azalpenen bat. Adibidez, lagun min baten aitarekin sexua dugula amesteak Edipo-konplexua islatzen du. Hau da, gu baino helduagoa den norbaitekin egoteko gogoa erakusten du, babesa izateko beharra, alegia.
Bestalde, pertsona askok amestu izan du noizbait talde batek bortxatzen duela. Horietako askok sexua kontzeptu zikin baten moduan ikusten dute eta horri aurre egiteko, garrantzitsua da mota honetako ametsak dituzten pertsonek euren buruarekin duten komunikazio arazoa konpontzea.
Nesken kasuan, batek baino gehiagok amestu izan du beste emakume batekin oheratzen dela eta horrek ez du esan nahi homosexuala denik. Gehienetan emozioak orekatzeko beharra dugun momentutan gertatzen dira horrelako ametsak.
Familiako norbaitekin sexua dugula amesten dugunean, berriz, zerbait bilatzen ari garenaren seinale izan daiteke. Besteak beste, familiako sekretu bat aurkitu nahian gabiltzanean jazotzen dira amets hauek. Era berean, babesa behar dugunean ere gertatzen dira.
