Inor gutxik espero zuen Athleticen hasiera zoragarri hau. Cristiano Ronaldoren Real Madrilen eta Messiren Barçaren pare dabil talde zuri-gorria.
Taldea ez zen batere ondo aritu Europako Leagueko atariko kanporaketetan, Young Boysen eta Tromsoeren aurka, Europako iparraldeko bi talde ahulen aurkako neurketetan.
2009/2010 denboraldia Espanyol mendean hartzen irabazi zuen Toqueroren gol batekin. Jokalari hau oso maitatua da baina kalitatea ez omen du soberan. Ondoren, euskaldunek Xerez garaitu zuten, baina beharrezkoa izan zen jokalari andaluziar batek gola bere atean sartzea.
Fernando Llorente, euskaldunen izar nagusia, ez zen bere mailarik onenean ari eta zaleek gogorarazi zioten. Gainera, zaleak taldearekin ez zeuden batere gustura eta zalantzak agertu ziren, ez baitzituzten argi taldeak jaitsiera saihestuko zituen aukerak.
Dena aldatu zen, ordea, azken astean, Llorentek bi gol egin zituenean Austria Vienaren aurka Europa Leagueko multzoen faseko lehenengo partidan. Egun batzuk geroago, beste bi gol egin zituen Vila-realen aurka, euskaldunak zerura eramanda.
Antzinako moduan. Bartzelona, Real Madril eta Athletic Club, sekula lehenengo maila utzi ez duten taldeek, sailkapenaren buruan dira. Hasiera hau ez da oharkabean igaro Europako prentsarentzat, bi handien artean talde xume bat kokatu da.
Athletic urakana
“Bi zaldien arteko lasterketa izango dela aurreikusten zuten, baina lehoi batek ezustean harrapatu ditu denak eta hesiak dotore ari da igarotzen”, esan du ESPN Soccernet-ek.
Web honen arabera, mundu mailako lider dena, San Mameseko lehoiak ez ziren hautagaien artean sartzen azken denboraldiak sufrimenduaren bidean eman ondoren. Artikuluak Iker Muniain ere aipatzen du eta gazte zuri-gorria Wayne Rooneyren euskal bertsioa dela gaineratu.
The Guardian egunkari britainiarrarentzat, “Athletic urakana bolada onean da oso altu hegal egiten duen Fernando Llorenteren eskutik”. Espainiako selekzioarekin joateko deialdiek edota Caparrosek emandako konfiantzak zerikusia izan dezakete, baina argi dagoena Llorente Athleticen egoeraren “errudun handienetarikoa” dela.
Liga Talkek, Double Decaer Group talde handiko futbol webguneetako batek, Athleticen filosofia goraipatzen du.
“Athleticek ez lituzke arazorik izango harrobiko zortzi jokalari deialdian sartzeko edo herrialdeko selekzioarekin deituak izan daitezkeen sei jokalari zelairatzeko, UEFAk emango dituen proposamenetako batzuk betetzeko, alegia”, esan du webguneak.
Zaleek badakite Real Madrilen eta Bartzelonarekin batera luzaroan irautea ezinezkoa dela, baina harro egon behar direla taldeak egiten duen futbolarekin, gaineratu du Liga Talkek.
Igor Lansorena (jatorrizkoa ingelesez, “Athletic Club Bilbao’s dream start in the spotlight“)
