Tag Archives: Samuel Sanchez

Xabier Usabiaga: ‘Arrateko erregea’

Samuel Sanchezek Arraten irabazi du. Lortu du bere etapa. Ia urterekoa. Seigarrena. Bide batez, marka jarri du hirutan jarraian irabazita. Kostako da lorpen hori haustea. Ez da erraza Arraten irabaztea, are zailagoa da hirutan jarraian gailentzea. Arrateko errega izan bide da puska batean.

Iragarri gabeko ezer gutxi gertatu da. Nañabarduraren bat edo beste. Faboritoak, nagusiak behintzat, aurrean izan dira. Samuel Sanchez eta Chris Horner. Estatubatuarra izan da guztietan ausartena, inork baino lehen eraso egin duena. Eta eraso egin bakarrik ez, bere joari iraupena eman dio, txapeldunek egiten duten moduan. Besteren baitan egon gabe, eurek jorratzen dute komeni zaien bidea. Antzera jokatu du Joaquin Rodriguezek.

Samuel geroago heldu da lasterketa burura. Hotzagoa da, zuhurragoa, azeriagoa. Hori bai erraz heldu da bikoarengana, nahiz eta haiengandik metro batera geldituta nekatu itxurak egiten aritu den. Geroxeago, helmugatik gertu, berriro erreleboak emateari utzi egin dio, nagi ibili da eta Joaquin Rodriguezek jokabide zeken hori aurpegiratu dio. Uste dut kataluniarrak arrazoi zuela kasu horretan. Samuelek ez du inor engainatzen jada. Bere azpikeriak ezagunak dira eta noiz edo noiz larrutik ordaindu ditu. Uste dut iaz Alpe d’Huezen horregatik ez zuela irabazi, martingala gehitxo ibili zuelako Contador harrapatu zuenean. Txapeldun baten estatusa eta palmaresa ditu, baina beti ez du hala jokatzen.

Txapeldun gisa jokatu izan balu, uste dut Horner eta Joaquin harrapatzearekin bat segiko zuela lanean, aurkariak atzean uztea lehenetsiko zuela. Ez zuen egin eta etapa irabazi zuen. Beajondeiola, baina orain beste mehatxu bat dauka, Tony Martin, iazko erlojupeko garailea, Munduko Txapelduna.

Xabier Usabiaga: ‘Aurten behar du’

Samuel Sanchezek behin baino gehiagotan izan du Euskal Herriko Itzulia irabazteko aukera. Ibili, beti ibili izan da ondo. Bost etapa garaipen ditu eta hirutan igo da podiumera, beti hirugarren. Baina, irabazteko aukerarik onena 2006an izan zuen. Azken etapara, Zallako erlojupekora, lider heldu zen, baina huts egin eta azkenean seigarren amaitu zuen. Garaipenetik ez da inoiz hain gertu egon.

Aurtengo ekitaldia gaur jarriko da abian eta auskalo zer postutan amaituko duen, baina, teorian, inoiz baino aukera hobea du sailkapen nagusian gailentzeko. Bera sasoiko da. Hori ezinbestekoa da. Kataluniako Voltan etapa bat irabazi zuen eta bigarren amaitu sailkapen nagusian. Azken bi astetan, normalean, gora egingo zuen, prestaketa hartarako doitu duelako. Ibilbidea, eta batez ere azken erlojupekoa aldeko ditu. Garaipena lortzeko kontutan hartu beharreko beste ezaugarria aurkariak dira, eta horretan ere abantaila handia izango du beste urte batzuekin alderatuz.

Aurtengo itzuli txiki onenetan nagusitu diren ziklista bakar bat ere ez da izango bertan. Ez Wiggins (Paris-Niza), ez Nibali (Tirreno-Adriatiko), ez Valverde (Andaluzia), ez Evans (Nazioarteko Kriteriuma), Leipheimer (San Luis). Hori alde handia da.

Beldurrik handiena Chris Hornerrek eman bide dio. 2010an nagusitu zen eta Tirrenon oso oso ondo ibili zen, irabazteko zorian izan zen. Izenei begiratuz gero Andreas Klodenek ere errezeloren bat sortuko dio baina alemaniarra ez da iazkoa. Ez dirudi behintzat. Iaz 5. Izan zen Algarven, ondoren 2. Paris-Nizan eta gero Euskal Herriko Itzulia eraman zuen. Aurten, ez da inon agertu.

Aurkariak ordea, etxeko atarira atera orduko sortzen dira. Joanquin Rodriguez, Cunego, Scarponi, Jurgen Van den Broeck, Robert Gesink, Dan Martin edota Peter Velits eta beste batzuk aintzat hartzeko moduko izenak dira, baina Samuel Sanchezek ez lioke inori beldurrik izan behar. Aurten du, inoiz izatekotan, irabazteko aukera.

Iritsi da Euskal Herriko Itzulia, heldu da Samuel Sanchez

Samuel Sanchezek aurreko astean lortu zuen denboraldiko lehen garaipena. Kataluniako Voltako etapa batean gailendu zen. Bide batez, Euskaltelen estreinaldia eragin zuen. Lorpen horrek irakurketa bikoitza du. Batetik erakusten du Samuel aurten ere fin ibili dela prestaketan eta sasoiko helduko dela denboraldiko helburu nagusietako batetara. Bestetik, taldeak etxeko itzulian izan ohi duen presioari aurre egiteko hauspoa da.

Karreran egiten duena egiten duela, Samuel garaipenaren lehian ibiliko da. Bai etapetan, bai sailkapen nagusian. Hori ez da berria, beti halatsu ibili izan da. Bost etapa irabazi ditu eta hirutan izan da podiumean. Beti hirugarren. Posturik txarrena hamargarrena da. Bada zerbait. Samuel talde handi batek behar duen benetako lider bihurtzen da Itzulian eta aurten ere prest da.

Izan ere, Euskaltelek ezin du hutsik egin bere karreran. Zaleek ez liokete barkatuko. Eskaerak Tourrean baino ere handiagoak dira. Euskal zale guztien taldea izatearen ordainsaria da. Euskaltel ez ohiko taldea baita, hala izan da bere sorreratik. Eta bere filosofiagatik. Txirrindularitzan mundu guztiak du ziklista kuttun bat, edo gehiago, baina ziklistak izaten dira begiko. Taldeak ez. Baina, Euskal Herrian mundu guztia Euskaltelgoa da. Seguru aski zale guztien bihotzera heldu den talde bakarra da munduan, baina aldi berean zale guztien eskaerak asetu behar izaten ditu eta hori ez da beti erraza. Edonola ere Euskaltel, eta batez ere Samuel, prest dira. Garaipenerako prest.

Samuel Sanchez aztia da

Mendateek indarraren legea bakarrik onartzen dute normalean. Ezer gutxirako balio izaten dute azpijokoek, aldapa gora bertuteak eta gabeziak, denak bistan gelditzen dira. Lege horretan oinarriturik Samuel Sanchez Arraten gora igo zen ziklistarik indartsuena dela pentsatu beharko genuke, baina ez da egia. Irudiek argi utzi zuten. Erasoetan ez zuen parte hartu, aldaparik gogorrenetan imintziorik ere ez zuen egin, nahikoa lan zuen aurkarien erasoei erantzuten. Ohi baino motelako irteten zen gainera, asturiarrak jakin badaki beroago jokatzen, arrapostu azkarreko ziklista da-eta.

Erasoak eraso ordea indarrak oso parekatuta daude. Ahalegina handiagoa zen ahalmena baino. Helmugara inoiz baino jende gehiago heldu zen elkarrekin, hamaika. Inoiz ez da horrelakorik gertatu. Horrelakoetan, indarrek ezer erabaki ezin dutenean alegia, beste ezaugarri batzuk sartzen dira jokoan, eta horretan asmatu zuen Euskaltelgoak. Beste inor baino aztiago izan zen. Ez zuen alferrikako indarrik xahutu, neurri egokian erantzun eta itxaron zuen, erantzun eta itxaron behar zen garaian. Horretan maisua da, zuhurtziaren errege.

Eta helmuga aski ondo ezagutzeaz gain (iaz garaile eta orain urte bi hirugarren izan zen) jaitsieran beldur gutxi eta trebetasun handia duenez, indartsuena izan gabe ere, gailentzeko beharrezkoak diren ezaugarrien uztarketari esker nagusitu da.