Zalaparta ederra ari dira sortzen Mundu osoan WaveGarden enpresakoak. Aizarnazabalen, belardi, baso eta baserri artean olatuak sortzeari ekin diote. Surflarientzat aproposak izango diren olatuak, nahibeste, etengabe. Igor Barandiaran gerenteak eskeini digu elkarrizketa.

Hona WaveGardenek berak baikor izateko arrazoien artean aipatzen dituen datu batzu: Surfa, kirol gisa, adin guztietako jendeak egiten du munduko bost kontinentetan eta munduko 86 herrialdetan. 25 milioi surflari baino gehiago daude eta surfa kultura-fenomenoa da, esparru horretako moda-etxeak mundu-mailako ikono bihurtu dira.
Surflariak, bainulariak, ikusleak, surf-eskolak, surf-txapelketak, dendak, jatetxeak eta abar etengabe biltzen dira surf-guneetan. Hori dela-eta, surf-gune onak dituzten hiriek surfari lotutako ekonomia-hazkundearen onurak jasotzen dituzte. Surf-industriak urteko 3 mila milioi dolarreko irabaziak gainditu ditu, eta aurreikuspenen arabera, datozen urteetan ere modu nabarian hazten jarraituko du.