Debaldeko publia?

Aurrekoan barruko kontuetaz aritu ginen, eta oraingoan, aldiz, beste komunikabideekiko harremanetaz aritu nahiko nuke, lehengo astean gertatutako baten kontura.

Igandean saio berria jarri genuen abian ETB-1en: “Bizirik”. Telebistaz ezer gutxi dakienak ere argi du saio baten arrakastaren gakoetako bat promozioa dela, eta estreinuaren bezperan, han eta hemen agertzea garrantzitsua izaten dela. Bada batetik telebistak berak egiten duen publizitatea, eta bestetik kanpotik datorrena. Astebete lehenago, banuen jakinmina, hainbeste mimoz eginiko saioak ea zer nolako arreta piztuko ote zuen jendartean, eta kinielatxoa egin ere egin nuen, aitortuko dut. Eta ez, ez nebilen oso oker… Batek badaki honez gero gutxi gora behera zeinek deituko dion, eta elkarrizketa nondik bideratu nahiko duen: Batek zuzendaritza berriaren kontra aritzeko probestuko duela, besteak euskalzaletasun azterketa egingo digula…. Eta badira elkarrizketak, erosoago edo lasaiago erantzuten direnak, besteak baino. Hona promozio aste baten kronika.

Berria. Euskerazko katean aritzen garenok jakin badakigu Berriak beti egingo digula kasu. Hori izaten da behintzat gure itxaropena. Militantzia eskatzen diogu, alegia, gure antzera erdaldunez inguratuta euskeraz bakarka ari denari, eta elkarren artean lagunduko garen esperantza izaten dugu. (Beste baterako gogoeta guk ere beraiekin berdin jokatzen ote dugun….). “Bi errepidean”en aritzen ginenean, beti aipatzen genuen zorte txarra ere bazela emakizuna astelehenetan izatea, juxtu euskerazko berripapera etxeetan jasotzen ez dugun egun bakarrean. (Zazpi egunekoa inoiz iristen bada, seinale txarra ez!).  Egunkari gutxitan ikusten genuen beraz gure emakizuna azpimarratuta. Oraingoan ordea, zorionekoak gu! Berriako kazetariak elkarrizketatu ninduen, txukun aski gainera. Saioaren gainean batipat, baina ETBk azken urte hauetan izandako ildoari errepasoa ere emanez.  Emaitza: igandean, orrialde osoko elkarrizketa, argazki eta guzti. Off de record-a gorde, eta nik esandakoak txukun eta zintzo bilduta. Eskerrik asko!

Deia. Txoritxoaren kaiolako nagusiak aldatu zirenetik, Deiak etxe honekin izan duen harremana ere nabarmen aldatu da. Lehen dena zoragarri zen tokian, orain dena beltz. Barne komunikazioak oso ongi funtzionatu izan ez duen garai batean, etxe barruko kontuetaz jakiteko bide egokiena izan da Bizkaiko egunkaria, eta hori eskertu beharrean gaude. Filtrazioak ugari izan direnez, ordea, bertako kazetariekin hitz egiten zuen oro susmagarri bihurtzen zen azkenaldian. Egur emaile ofizialak telebistaren gaineko kontuak politika atalean eta ez egunkariaren atzekaldean argitaratzen dituenetik, beste kazetari bati eman diote, ordea, telebistako jendea elkarrizketatzeko ardura. Harremana goxatze aldera, mesfidantzarik izan ez dadin akaso. Gure zuzuendari ohiak zuzentzen duenekoa ere, nahiko txukun, odol askorik gabekoa. Emaitza, beste orrialde oso bat.

Gara. Maketazio berria dutenetik, telebista kontuek tarte handirik ez dute kentzen, eta parrilaren gaineko laukitxo batzuk probesten dituzte hangoaren eta hemengoaren berri emateko. Horietako bat guretzat izan zen, telebistak berak bidalitako ohartxoa jasoz.

Correo. Ustez gure nagusi berriekin hobekien moldatzen den komunikazio taldea da hauxe, jakina denez. ETB-1 ikusezin bihurtu izan duen talde bera. Hemerotekan bilatze lan zorrotza egin beharko genuke, parrilaz gain, euskerazko katearen aipamen edo haren gaineko elkarrizketa sakonik topatzeko. Eta ez, oraingoan ere ez ez da halakorik izan. Ezustekoa, ordea, Correok eskeini zidan igande goizean. Parrilaren gainean, zinta gorri gorri bat, saioaren estreinuaren berri emanez. Ordaindutakoa, noski.

correo

Ikusitakoak ikusita, zer nolako audientzia izango genuen baino, bestelako kezka geratu zitzaidan buruan: Dirua eman behar diogu zeini eta bestela batere jaramonik egiten ez digun horri? Eta hori bada bertan agertzeko modu bakarra? Hori bada nahiko motibo neurria zilegi izan dadin? Gure saioaren targeta ikusita, Correoko edo Berriako irakurle gehiago ote ditugu ikusleen artean? Beti lagundu izan diguten horien borondatea probestu, eta muxutruk egiten diguten horren truke esker oneko keinurik ez? Behar gehiago dutela jakinda ere ez?  Dirurik ez haientzat? Diru kutxaren giltzarik nik ez dudanez, esker beroena luzatu, besterik ezin egin. Eskerrik asko aurrerantzean ere jaramon egiten jarraituko duten horiei, baita egurra emango digutenei ere.

7 thoughts on “Debaldeko publia?

  1. Asier Azpilikueta

    Ai, Urko, azken paragrafoan jo duk arazoaren muina. Euskaldunok (euskal hiztunok) Correo bezalako egunkariak erosteari utzi eta euskarazkoak erosten hasten garelarik, orduan, konponduko dituk gure arazotxo asko.

    Reply
  2. beste bat

    Sekula ez dut ulertuko Gipuzkoan El Diario Vascok (El Correo Español-en talde berekoa) duen arrakasta. Gernikako arbola baino jende abertzaleagoak, euskararen alde baino aldeago dagoenak, egunkari horixe erosten eta irakurtzen du. Zer pentsatua emateko modukoa.

    Segi programa horrekin Urko. Txintxo ibili eta ondo izan!

    Reply
    1. Urko Aristi Post author

      Pentsatu nahi dut eskeletatik haratago doan beste arrazoiren bat badela.. Nafarroan ere antzekoa gertatzen da Diario de Navarrarekin.. Eremu euskaldunenetan ere, etxean betidanik jaso izan duten egunkari horren harpidedun izaten jarraitzen dute askok eta askok… Tradizioa… Inmobilismoa…

      Reply
  3. Pedro

    Ba nik ez dut egunkaririk erosten, internet bidez begirada bat ematen diet hainbat egunkariri. Zure saio berria ikusi nuen joan zen igandean eta hontan ere ikusteko asmoa dut. Ez nintzen enteratu bertako telebista programazioak begiratuta baizik eta zuk egin zenuen publizidadeari esker zure eguraldi saioan.

    AAAAAAAAAAAaaah eta gustatu zitzaidan.

    Eta nire amak etxean Diorio Vasco hartzen du, betidanik horrela egin delako nire etxean… tradizioa…… auskalo!

    Reply
  4. Txillar

    Aupa Urko. Zorionak programagatik, asko gustatu zait ideia eta planteamendua. Nagusiak pixka bat goizago jarriko balute, mesede. Bestetik, oso egokia iruditu zait gertutasuna lortzeko hika egitea, baina horretarako jakin egin behar da! Gazte askoren bekatua da, tokatzen ez denean ere (mendeko perpausetan) aditzak aldatzea (alokutiboak sartzea): ze ezaugarri dizkiken sagardoak (gaizki); ze ezaugarri dituen (ondo).

    Reply
    1. Urko Aristi Post author

      Ba arrazoi, ordutegia ez da egokiena… eta konpontzekotan dira: aste honetatatik aurrera, astelehenetan izango da, eta goizxeago. Hikari dagokionez ere, arrazoi bete betea. Ez etxean ez herrian ohiturarik ez, eta oraintxe ikasten ari naiz pixkanaka pixkanaka, eta ohartu bazinen, saio guztian pasarte horretan bakarrik erabili nuen, elkarrizketatua hikara pasa zelako, eta harekiko errespetuz, hikara pasa nintzen, jakinda zuk aipatutakoaren moduko hankasartzeak egiteko. Hurrengoan txukunago saiatuko naizela agintzen dizut. Eta eskerrak noski, halako kritikekin baino ez delako bide zuzenetik ibiltzen asmatzen.

      Reply

Utzi erantzuna beste bat(r)i Utzi erantzuna

Zure e-posta helbidea ez da argitaratuko. Beharrezko eremuak * markatuta daude