Behin, neska batekin maitemindu nintzen.

Orain arte, dena normala,

neskak mutilekin maitemintzen dira,

eta mutilak neskekin;

eta ez gara hasiko bestelako bariableekin,

ugariak baitira eta dibertigarriak, batzuk.

Kontrabandoko maitasuna zenez,

(emakumeak senarra zuen, eta jeloskorra oso)

taberna xixtrin eta ezezagun batean egiten genuen topo.

Billarrean jokatzen genuen,

eta gehienetan irabazi egiten zidan,

eta zerbeza txekiarra edaten genuen,

botilatik zuzenean, trago batez,

eta The Clashen kantak dantzatzen genituen,

eta emakumezkoen komunean sartutakoan,

ai, ama, zer zen hura!

Handik gutxira,

haren gizonak abisua eman zidan,

Kosoboko haragizko armairu baten bidez,

eta utzi behar izan genuen, penaz.

Oroimenez aldatu ezinik, oso maitea bainuen,

tabernaz aldatu naiz.

Ez dago billarrik

eta barran dagoeneak uste du

The Clash garbitzeko produktu bat dela,

eta Kosobo Goierriko herri bat, Tolosatik gertu.

Prostituta baten gabon-postala, Minneapolisetik

E, Txarli, haurdun nago,
eta 9. kalean bizi naiz,
liburu-denda ziztrin baten gainean
Euclid etorbidearen izkinan,
eta drogak utzi nituen,
eta whiskya ere bai,
eta senarrak tronboia jotzen du
eta autopistan egiten du lana.

Eta maite nauela esaten dit,
eta jakin badakien arren ez duela berea,
umea berea izango balitz bezala
zainduko duela agindu dit.
Eta bere amak janzten zuen
eraztuna oparitu zidan,
eta dantzalekura gonbidatzen nau
larunbat gauero.

Eta e, Txarli, zurekin akordatzen naiz
zerbitzugune batetik pasatzen naizen bakoitzean,
zure piuragatik,
olio zopa galanta zeneraman ilean.
Eta oraindik gordetzen dut disko hura
Little Anthony eta the Imperials,
baina disko-jogailua lapurtu zidaten,
bitxia kontua, ezta?

E, Txarli, ia burua galdu nuen
Mario giltzapetu zutenean,
horregatik aldegin nuen Omahara,
nire jendearekin egon nahi nuen,
baina lagun guztiak
edo hilda nituen edo kartzelan,
eta Minneapolisera itzuli nintzen,
baina oraingo honetan hemen geratzeko,
hala pentsatu nahi nuke.

E, Txarli, zoriontsua naizela uste dut,
lehenbizikoz istripua izan nuenetik,
eta drogatan botatzen genuen diru guztia
orain nirekin izango banu,
bigarren eskuko autoen negozioan hasiko nintzateke,
baina ez nuke bakar bat ere salduko.
Auto bat diferentea erabiliko nuke
egunero, nire animoaren arabera,
zoragarri litzateke.

E, Txarli, jainkoarren,
egia jakin nahi?
Ez dut senarrik,
ez du tronboia jotzen,
eta dirua eskatu behar izan dut
abokatua ordaintzeko.
E, Txarli, e,
baldintzapeko askatasuna onartu behar didate,
etorri San Valentin egunean.

Tom Waits (Blue Valentine diskotik)

Ez dut sekula ofiziorik izan

(zuzendari izatea kargua da).

Liburu asko irakurri ditut:

Platón, Aristoteles, Spinoza…,

bizitza ulertzen lagunduko zidatelakoan,

baina estuasunean gorri-gorri jartzen naiz

eta neure baitan gordetzen.

Barre egitea gustatzen zait, barrena askatzearren,

baina nago ez dutela guztiek ongi hartzen,

beraiengatik egiten ote dudan mesfidantzaz.

Euskal idazlea naizela diote,

baina nire alabei suspenditu egin diete euskara institutuan,

eta kalera lotsaz beterik atera behar izan dut.

Jende artean nagoenean nahastu egiten naute kamareroekin,

eta eskuak edalontziz betetzen dizkidate.

Hitzen balioa zein den badakidalako

isilik geratzen naiz, hitz egin behar dudanean,

eta harroputzatzat hartzen naute, txuloputatzat.

Lotsatia izatea ere iraintzat hartzen dute

(euskalduna batez ere ausarta omen da).

Mesede asko egin ditut, trukean ezer jasotzeke,

baina  kontabilitate libururik ez daramat

eta ez dut egindakoa ziurtatzerik.

Behin baino gehiagotan hartu naute, hartu gaituzte, tontotzat,

inoren negarrak benetakotzat jo izanagatik.

Ez zait politikaz hitz egitea gustatzen,

eta bada faszistatzat hartu nauenik horregatik soilik.

Beti iristen naiz berandu toki guztietara,

dena amaitzear dagoenean, eta pintxoak janda.

Horregatik gustatzen zaizkit udazkeneko amodioak,

berez itzaltzen dira kolore gorriz pintaturik.

Ez dut gorbatarik eramaten

eta gizon batek errieta eman zidan horregatik

Diputazioko atarian nengoela;

baina badira bizitzan kontu okerragoak,

inori inoiz pozik ez ematea, esaterako.

Amodio

Ahazterik ez, eta esperantza eta amets.
Paisaia hil egin behar dut,
begirada non pausatu nahi badut.
Denbora bizitzaren ordezko.
Mundu guztia bat-batean paperezko.
Eta beldurra.
Jendea ere joan egiten zait fotoetan.

Hutsak denbora betetzen du;

ahantziak oroimena larrutzen:

ausentziak eromena larritzen;

eta eromenak amodioa askatzen.

sei

Amodio:
bihotzetik heltzen digun gaitza.
Denbora okagarri. Ibai gorri-gorria.
Itzulbiderik ez duen kale ixkina.
Emazte bat. Eztularentzako jarabe.
Harrera egitearen ohitura.
Psikiatren lasterketa. Hizkuntzaren forma
anormala. Amarru tentela egunen akaberan.
Zorion modu bat itxuratzeko txorakeri pila bat alegia.

zortzi

Amodioa,
zorionez, maitale batek libratu ninduen harengandik.

1. Begirada bat ulertzen ez duenak, ez du azalpen luzerik ulertuko.

2. Zoriontsuak ematen dutenak eman dutela oroitzeke eta jasotzen dutenak jaso dutela ahazteke!

3. Amodiorik tristeena, amodioari uko egitea da.

4. Inor ez da libratzen matemintzetik; okerrena da hori aldarrikatzen ibiltzea.

5. Matemintzearen izuz bizi dena ez da sekula libre izango.

6. Uholdea tanta txiki batekin hasi zen. Amodioa, begirada xume batekin.

7. Amodioak zarata gehiegi eskatzen du, isiltasunean gordetzeko.

8. Ezagunari lotzea, ezezagunaren izuz, bizirik irautea da; baina ez bizitzea.

9. Maitaleak ez dira egiten; elkar ezagutzen dute.

10. Amodioa izan daiteke bide okerra, baina beti darama helmugara.

Amodio: arrosa krudel,
literaturaren makurkeri,
On Kixote negarrez,
Goyaren kapritxo,
Urtainen suizidioa,
buruko infernu.
Zugan hilda egotea.
Txoria sutan.