Geuk eus kanpaina, Bermeoko Arrain Azokan
Bermeoko Udalak herriko hainbat eragilerekin elkarlanean ‘Geuk eus’ euskaraz bizitzeko 1.000 arrazoi kanpaina jarri du martxan, eta gaur aurkeztu dute, Kalinpan maskotaren konpainian. Blog honetan kontatuko dizkizuegu xehetasunak.
Euskararen erabilerari buruzko hausnarketa egin ostean, gaitasun handia egon arren, erabilera ez omen da espero daitekeena herrian. Hori dela eta, ‘Geuk eus’ kanpaina abiarazi dute. Honako helburu hauek bultzatu nahi dituzte: herritarren artean euskararen prestigioa hobetzea, euskaldun izatearen abantailak gizarteratzea, herritarrek galeraren kontzientzia hartzea, jokaera kontzienteak piztea eta, herritar guztiak sentsibilizatzea.
Euskara Aholku Batzordean kanpaina garatzeko hainbat ideia eta proposamen egin dira eta nork bere arloan lantzeko prest dago.Hala, kanpainarako kanta bat sortzeko proiektua lantzen hasi dira Bermeoko hainbat musika talde. Lore Barrena bertsolari bermeotarrak jarriko dio hitza abestiari.
Horrez gain, bost bermeotar ezagunen laguntza paregabea izan da kanpainaren prestakuntzan: Arantza Ruiloba kirol-monitorea, besteak beste.
‘Geuk eus’ Arrain Azokan
Proiektua presente egongo da Bermeoko Arrain Azokan ere, maiatzaren 20an, 21ean, eta 22an bere karpa propioa izango baitu, bideo-photocall karpa, hain zuzen ere. Kalinpanek lagunduta, nahi duten pertsonek euskaraz egiteko arrazoiak azaldu ahal izango dituzte bai barruan grabatuko diren bideoetan edo/eta bai kanpoan aterako dituzten argazkietan. Helburua 100 bideo egitea eta 300 argazki ateratzea izango da.
‘Geuk eus’ kanpaina hasi besterik ez da egin, epe luzerako martxan jartzen den ekimena baita.
