Category Archives: Albisteak

Web ekimenen aurkezpena, #EBEuskadi’13n

Leave a reply

EBEuskadi’13ren aurkezpenaren ondoren, ekintzaileen proiektuak (web ekimenak) aurkeztu nahi ditugu oraingo honetan. “Startups” delakoei eskainiko diegu aurten ere gure topaketa, eta horri esker, enpresa teknologikoen produktu berriak ezagutzeko aukera izango dugu, ekintzaileen formazioan sakontzeaz gain.

Horregatik, ekintzailea bazara edo izan nahi baduzu, ez daukazu hitzortu hau galtzerik. Parte hartzeko, bidali zure proiektuari buruzko informazioa info@eventoblog.com helbidera.

Hurrengo asteetan 6 web ekimen aukeratuko ditugu, EBEuskadiko parte hartzaileen aurrean aurkezteko. Aukeratzen dugun ekimen horietako bakoitza banan-banan aurkeztuko da ondoren topaketan. Proiektu bakoitzaren arduradunak 5 minutu izango ditu bere ekimena azaltzeko, eta ondoren, beste 5 minutu izango dira galderak egiteko.

Denbora tarte bat ere izango da, gainera, enpresa eta ekintzaileek euren produktu eta zerbitzuen berri eman dezaten. Enpresek euren berrikuntzek zer inpresio sortzen duten jakiteko aukera izango dute eta entzuleek, horrelako ekimenak nola garatzen diren ezagutuko dute. Esperientzia honek arrakasta handia izan zuen EBEuskadi’12n.

Jose Antonio del Moral, ekimenen aurkezlea

Jose Antonio del Moral

Jose Antonio del Moral

Jose Antonio Del Moralek (@jamoral) aurkeztuko ditu web ekimenak EBEuskadi’13 topaketan. Del Moral Alianzo enpresako bazkide-zuzendaria da; eta bazkide da baita ere Agoranews, Mapalia Networks, Chicisimo eta Sequoia Internet enpresetan (bideoa interneten, web semantikoa eta sare sozial tematikoetan aritzen dira enpresa horiek). Ekonomia alorreko abokatu lizentziatura du Deustuko Unibertsitatean, Telekomunikazioen masterra Namurreko Unibertsitatean (Belgika) eta Interneteko Politikan espezializatu zen Stanfordeko Unibertsitatean (AEBak). Ya.com Internet Factoryren bazkide sortzaile izan da eta Vocentoko Interneteko edukien arduradun ere bai. “La blogosfera hispana” eta “Web 2.0: Manual de uso” liburuen idazleetako bat da eta Startup 2.0 Europako lehiaketako eta Nonick nazioarteko ekimenaren antolatzailea ere bada. El Mundo egunkariaren arabera, Espainiako 25 eragilerik garrantzitsuenen artean dago, Internet munduan.

David Sifry: ‘Arrakasta izateko, gauza bakar batera mugatu behar duzu’

Leave a reply

‘Web soziala, produktua edo zerbitzua’ lelopean, Interneteko adituak eta arituak batu dira, gaur, Bilbon, EBEuskadi ekimenean. Web sozialaren oraina eta etorkizuna izan dute mintzagai. Goiz parteko saioa, lau hitzaldik osatu dute, eta protagonista nagusia, dudarik gabe, David Sifry Technorati munduko blog bilatzaile ezagunenaren sortzailea izan da.

Sifry eta Uribe-Etxebarria, EBEuskadiko antolatzaileekin eta laguntzaileekin

Sifry eta Uribe-Etxebarria, EBEuskadiko antolatzaileekin eta laguntzaileekin

Xabier Uribe-Etxebarria lagun eta kolaboratzailearekin batera, interneten negozio batek arrakasta izateko gakoak zeintzuk diren azaldu ditu; ‘lehenik eta behin, gauza bakar batera mugatu behar duzu zure egitekoa’ eta ‘jarrera positiboa eta talentua behar beharrezkoak dira’. Horiexek dira, hitzez hitz, internauta ezagunaren hitzetan, arrakastaren gako nagusiak.

‘Inguruak ere, noski, lagundu egin behar du’, gaineratu du Uribe-Etxebarriak, Anboto enpresaren sortzaileak. Bere aholkua, honakoa: ‘negozio plana bakoitzak berea idatzi behar du, eta ondoren, beldurrik gabe, ate-joka hasi’. Halaber, ‘langileak zaindu’ egin behar direla esan dute Sifryk eta Uribe-Etxeberriak . ‘Zaindu eta langileengandik ikasi. Ez dira langile hutsak, enpresaren kulturaren transmisoreak dira’.

‘Facebook y Tuenti, ahitzen’

Markek sare sozialetan dituzten mugen inguruko hitzaldia etorri da ondoren, Felipe Romeroren eskutik, Estatuko merkatu aztertzaile ezagunenetakoa. The Cocktail Analysis enpresaren sortzailea eta zuzendaria da Romero, eta bere eskarmentuak emandako irakaspenak azaldu ditu. Bi ondorio nagusi jarri ditu mahai gainean: modako sare sozial guztietan egon beharrik ez dago eta hain modan ez dauden beste sare sozial batzuk egon badaude, blogak eta foroak, esaterako, markei begira oso eraginkorrak direnak. Azken bi urteotan, bestalde, Facebook eta Tuenti bezalako sare sozialak ahitzen ari direla esan du. Twitter, berriz, hazten ari den sarea da. Hain zuzen, Tuentitik Twitterrera geroz eta gazte gehiago omen doaz.’Garai batean telebistak ematen ziguna ematen digu gaur Twitterrek; hizketarako gaia. Kalean zertaz hitz egin dezakedan esaten dit’.

Romeroren saioaren ostean, Mikel Agirregabiriak hartu du hitza. Agerraldi labur batean, Blogeu Euskadiko Blogarien Elkartea aurkeztu du. Ondoren, Diana Gonzalezen txanda iritsi da; EBEuskadik gaurko ekimenerako aukeratu dituen sei web proiektuak banan bana aurkeztu ditu. Egitasmo berritzaileak eta interesgarriak, inondik ere:Socialitas, DADA Company, Dokkus, Workmunity, Me The One eta Guggenheim Bilbao Webgunea ( Novisline) ezagutzeko aukera izan dute gaurko ekimenera hurbildu diren guztiek.

Euskarak badu lekua interneteko negozioetan

Goizeko saioari amaiera Luistxo Fernandezek eta Nagore Guarrotxenak eman diote. ‘Euskararen negozio digitala’ izenburupean, CodeSyntax eta Akting enpresen zertzeladak plazaratu dituzte. Euskara punta puntako egitasmo teknologikoetan dago eta etorkizunari baikor begiratzen diote, euskarak baduelako lekua interneteko proiektu aurreratuenetan.

EBEuskadi iruditan ikusteko, horra argazki galeria eta bideoa.

David Sifry, Technorati-ren sortzailea, EBEuskadin egongo da

Leave a reply

Jakin bagenekien nazioarteko izen handi bat izango zela EBEuskadiren parte hartzaileen artean, eta gaur baieztatu digute albistea: Technorati, blogen bilatzailerik ezagunenaren sortzailea, David Sifry (@dsifry), Bilbon izango da datorren larunbatean, EBEuskadi ekimenean. Lehenaz gain, egitarau benetan erakargarria bertan izango garenentzako, hizlarien zerrenda ez baita nolanahikoa.

dave-sifry_pequeAski ezaguna da Sifryren ibilbidea; berrikuntza teknologiko orori begira, intenerneten buru belarri dihardu lanean. Technorati da bere proiekturik ezagunena, baina beste hainbat ekimen ere baditu eskuartean. Besteak beste, duela gutxi, Offbeat Guides sortu du, 30.000tik gora leku turistikori buruzko informazio pertsonalizatua sortzen eta bideratzen duen sistema.

Gurean hain ezaguna den Xabier Uribe-Etxeberria (@uribeetxebarria), Anboto Group-en sortzailea, gertutik ezagutzen David Sifryk. Elkarrekin hainbat proiektutan aritu izan dira lanean. Hain justu, Uribe-Etxeberriak ahalbideratu du Sifryk bere agendan EBEuskadiri lekua eskaintzea.

Web sozialen esparruan, batez ere, lidergoaren garapenean eta hedabide digitalek sortutako eraldaketan, oso ezaguna da Technoratiko zuzendaria. Word Economic Forum eta Linux International ekimen aitzindarietan ere parte hartu du.

Web ekimenak aurkezpenerako aukeratutako produktuak

Leave a reply

Web ekimenei dagokien atalean aurkeztuko diren 6 proiektuak ezagutarazten dizkizuegu. Diana Gonzalezen erantzunkizuna izango da proiektuen arduradunak bideratu eta galdekatzea.

Bestelakoak, berritzaileak eta arrakastatsuak diren proiektu edo produktuen bila ibili gara. Era berean, bertaratutakoen feedbbacka jasotzeko interesa duen jendea eta negozio eredu berritzaile batean lanean diharduena izan dugu gogoan. Duela aste batzuk abiatutako deialdia dela eta jasotako proposamen guztien artean, interesgarrienak iruditu zaizkigunen hautaketa egin dugu. Berrikuntza, negozio eredu berriak eta bestelako ekimenak interesatzen baldin bazaizkizu, zuzenean ezagutzea gustatuko zaizkizula uste dugu.

Aurkezpen ekitaldia dinamikoa eta parte-hartzailea izan dadin, ekimenen sustatzaileek 5 minutuko aurkezpena egingo dute eta gero, beste 5 minutu izango ditugu galderak egiteko edota azalpen gehiago eskatzeko.

ebe-dada-company

Dada Company

Haurrentzako liburu interaktiboak eta smartphone zein tablet gailuetarako aplikazioak ekoitzi eta banatzen dituen editorial independente bat da DADA Company. Liburu ilustratuen eta eduki interaktiboen sektorean berritzailea den proiektu editoriala da. Dada Company osatzen dutenak eduki digitalen ekoizpenean, komunikazioan, teknologian eta pedagogian adituak dira; artezale sutsuak ere badira eta haur zein gazte sektorean esperientzia zabala izateaz gain, ume handi bat daramete guztiek barruan. Liburu digital interaktiboa funtzio eta zerbitzu berriak eskaintzen dituen formatu bezala ulertzen du lan-taldeak. Emaitza, umeei, esperientzia aberasgarria, dinamikoa, flexiblea eta multimedia eskaintzea da.

ebe-dokus

Dokkus

Dokkus, enpresen arteko dokumentu trukea erraztea helburu duen sareko kudeatzaile dokumental bat da. Enpresen artean bidaltzen diren dokumentuen joan-etorria sinplifikatzen duen sareko aplikazioa da. Zein dokumentu trukerako balio du? Laneko arriskuen prebentzioa, ingurumena, kalitatea, produktua, zergak, Gizarte Segurantza, formazioa, segurtasuna… dela eta dauden arau edo legeak konplitzen direla egiaztatzeko edota pertsona zein gauzen ezaugarriak, trebetasunak, konposizioak… betetzen direla ziurtatzeko.

metheone_logo

Me The One

Mundu zabaleko talentuak deskrubitzeko ekimena da MeTheOne, esparru globaleko talentu bilatzaile plataforma bat. Munduko edozein lekutako talentudun gitarra jotzaileak, abeslariak, skaterrak, surflariak, riderrak, malabaristak… aurkitzea da MeTheOne komunitatearen helburua eta bertan, trebetasuna jasotzen duen bideoaz gain, sare sozialetako (Facebook, Twitter) profila eta sareko onarpen mailari lotutako ospea ere adierazten dira.

socialitas-logo

Socialitas

Enpresa txiki eta ertainentzat Community Management zerbitzuak saltzeko plataforma bat da Socialitas. Gaur egun Europa eta AEBetako hainbat herrialdetan funtzionatzen ari den eredu bera, merkatu nazionalean ezartzea dute helburu. Hau da, marketing aholkularitzek, beraien zerbitzuak kanal presentzialez zein Internet bidez saltzea ahalbidetzea. Enpresa txiki zein ertainak Sare Sozialetan murgiltzeko Community Management paketeak eskaintzen dituzte eta enpresen online presentzia kudeatu ahal izateko, taldeko Community Managerrak dituzte.

workmunity_logo-300x186

Workmunity

Enpresa eta kandidatuentzako doako lehen enplegu eta networking atari profesionala da Workmunity. Enpresa espainiarren %90 baino gehiago oso txikiak dira (10 langile baino gutxiago), hortaz, garestiegiak dira egungo atarien prezioak (250 eurorainoko tarifak lan eskaintza bat argitaratzearren eta 40€ norbere CV berrikustearren). Zerbitzu horiek guztiak dohainik eskaintzerakoan, bertako hautagaiek lana aurkitzeko dituzten aukerak areagotzea da Workmunityren helburua, era horretan, neurri guztietako enpresek portal honen bidezko kontratazioa burutu dezaten erraztuz.

Guggenheim-Bilbao-Logo

Web Guggenheim Bilbao

Guggenheim Bilbao Museoa web gune berri bat prestatzen ari da. Bizkaiko hiriburuko eta Euskal Herri osoko kultur ardatz den instituzioaren web gunea diseinatzen ari den Novisline enpresako lan taldeak EBEuskadin hitz egingo du eta bertan, atari txundigarri bezala saltzen duten proiektuaren xehetasun batzuk eskainiko dituzte. Web guneak egungo estandarrak apurtuko dituen kontzeptu berri bat izango du oinarrrian eta museoaren irudiari nazioartean bultzada berria ematen lagunduko dio.

Blogeu-ren eta EBEuskadi-ren elkarlana

Leave a reply

Blogeu-k (Euskadiko Blogarien Elkartea) hasieratik eskaini dio babesa eta elkarlana EBEuskadiri; ekimenaren antolakuntzan eta zabalkuntzan eskaini zigun laguntza, eta horretan ari da. Eskertzeko laguntza, dudarik gabe.

Blogeu-ren logoa

Blogeu-ren logoa


Blogeu elkarte jaio berria da. 2011ko azaroaren 5ean egin zuen lehendabiziko ekitaldi publikoa. GetxoBlog-en III. Batzarraren baitan egindako eztabaida batean hartu zuen parte Euskadiko Blogarien Elkarteak.

Mikroblogginaren garaiotan, blogak esperientziak partekatzeko, eztabaida sortzeko eta ekimenak proposatzeko tresnak eta guneak direla aldarrikatzen du Blogeu-k. Nolabait, modako sare sozialetan ezinezkoak diren hausnarketak egiteko guneak dira blogak, Elkarte honen hitzetan.
Gizarteko alor ezberdinak jorratzen dituzten eta iritzi sortzaileak diren blogariek tarteka biltzea eta euren arteko eztabaida piztea da Blogeu-n helburua. Euren lana gertutik ezagutzea nahi baduzu, klikatu hemen.

‘Sare sozialak eta marken mugak’, EBEuskadin

Leave a reply

Felipe-Romero-Foto-150x150#EBEuskadiko egitarau zabalari buruzko xehetasunak ezagutzen ari gara, apurka apurka. Azken berria, horra: Estatuko merkatu-analista ezagunenetakoa den Felipe Romero (@flpromero) etorriko da #EBEuskadira, sare sozialetan marken erabileraz hitz egitera. The Cocktail Analysis enpresaren sortzaileetako eta zuzendaria da Romero. Dakizuenez, eitb.comen laguntzarekin, maiatzaren 12an egingo da blogei buruzko ekimen hau Bilbon, EITBren egoitzan. Romeroren hitzaldia goiz partean izango da, 11:30etatik 12:15era.

Kontsumoari, merkatuari eta sare sozialei buruz hamaika artikulu idatzi ditu Felipek, besteak beste, El Pais egunkarian duen blogean. Bere ustez, gure kontsumo ohiturek erakusten dute munduan dugun lekua; hau da, kontsumoaren arabera ezartzen ditugu harremanak geure buruarekin, ingurukoekin eta planeta osoarekin. Markekin eta produktuekin dugun hartu-emanak agerian uzten ei du kontsumo gizarte honetan dugun tokia.

Zerbait erostera doanean, kontsumitzaileak jakin badaki zer nahi duen, zenbat balio duen eta zenbateraino ordaintzeko prest dagoen. Informazio guztia dauka. Kontsumo ohiturak modu askotara aldatzen ditu Internetek; erosi nahi duzun produktu horretara berehala iristen zara, baina, aldi berean, datu guztiak berehala izate horrek hausnartzera eta konparatzera bultzatzen zaitu. Beste aukera batzuk ikustera eramaten zaitu Internetek. Hala, Romeroren arabera, kontsumitzaileak orain crossumers-ak dira, bigarren belaunaldiko kontsumitzaileak. Merkatu-analista den heinean, beraz, gizarte kontsumoan sare sozialek duten eragina aztertzen ari da. Horretaz guztiaz hitz egingo du #EBEuskadin.

Web proiektuak aurkezteko epea zabalik

Leave a reply

Sei web egitasmo aurkeztuko dira #EBEuskadi ekimenean. Parte hartu nahi baduzu, bidali zure proiektua, epea zabalik dago eta. Ondorengo lerrootan azalduko dizkizuegu proiektuek bete behar dituzten baldintzak. ordenagailua

Dakizuenez, maiatzaren 12an egingo da #EBEuskadi, Bilbon. Jardunaldi horietan, web egitasmo berriei tarte berezia eskainiko diegu. Iruri Knörrek (@iruri) aurkeztuko ditu aukeratutako egitasmoak eta webguneen egileekin ere berak hitz egingo du.

EBEuskadin aurkezteko moduko proiektu berritzaile bat eskuartean baduzu edota teknologia berriekin lotutako negozio eredu aitzindari batean buru belarri sartuta bazaude, ez dudarik egin, bidali zure proposamena eta EBEuskadira etorriko den publiko adituaren aurrean aurkezteko aukera izango duzu.

Proiektuen aurkezpena

Parte har dezaketen produktuak: Software eta hardward.Internetekin lotura zuzena duen edozein produktu aurkez daiteke, merkaturatzeko prest dagoena edota duela gutxi aireratutakoa. Hala nola, oraindik gauzatu gabe egon arren, ondo landutako proiektu edo ideia berritzaileek ere badute lekua EBEuskadin.

Proiektuak nora bidali

Apirilaren 10etik 24ra bitartean jasoko dira egitasmoak helbide honetan. Orrialde bakar batean proiektuaren laburpena azalduko beharko da ondoko datuekin:

1.- Produktuaren edo zerbitzuaren azalpena
2.- Balio erantsia
3.- Merkatua: nori zuzendua dagoen
4.- Antzeko ekimenak

Proiektuen aukeraketa

Esan bezala, jasotako egitasmo guztietatik sei aukeratuko dira, zerbait berezia eta berria eskaintzen duten sei proiektu. Apirilaren 24tik 30era bitarte jarriko gara harremanetan aukeratuko proiektuen egileekin, aurkezpenaren nondik norakoak azaltzeko.

EBEuskadi, web sozialen etorkizunari begirada

Leave a reply

EBECiudades ekimenak iaz hasi zuen bidaia hiriburuetan barrena, EBEMadrid-ekin. Sevillan duela sei urte martxan jarritako EBE jardunaldiak ezagutzera ematea du xede. Aurten, Bilbon da hitzordua: maiatzaren 12an egingo da EBEuskadi ekitaldia.

EBE formatu txikiagoan, baino oinarrizko filosofiari eutsita, hiriburu ezberdinetan aurkeztea da helburua. Interneten egunero sortzen denaz sakontzea eta informazioa partekatzea da jardunaldi hauen egitekoa. Berrikuntzek eta aurrerapen teknologikoek gure egunerokoan duten eraginaz hitz egitearen garrantzia nabarmendu nahi da.

EBE 2011 (Sevilla)

EBE 2011 (Sevilla)

‘Web Soziala, produktua ala zerbitzua?’

EITBren laguntzarekin antolatu dugu EBEuskadi ekimena. Hain zuzen, EITBk Bilbon duen egoitzan (Multibox aretoan) izango da ekitaldia, goizeko 10:00etatik 20:00etara, ‘Web Soziala, produktua ala zerbitzua?’ izenburupean. Zazpi adituren hitzaldiek osatuko dute eguneko egitaraua. Web sozialen gaurko eta etorkizuneko joerez arituko dira. Entzuleen parte-hartzea bilatuko dute hizlariek eta horretara egokitutako azalpenak eskainiko dituzte.

Egitarua eta hizlariak

Hona hemen, EBEuskadiko egitaraua eta hizlariak. Ekitaldia doakoa da, baina 400 lagunentzako lekua dago bakarrik. Izena emateko sartu helbide honetan. Twitter (#EBEuskadi) bidez ere helaraziko zaizue ekitaldiari buruzko informazio guztia.