Eingo al deu?

Munduko toki denetan ez zaio sexuari garrantzi bera ematen. Hori da behintzat kondoi marka ezagun batek egindako ikerketa batek erakusten duena. Baina zer gertatzen da beste herrialde batzuetan logelako argia itzali eta “bikoteak” ohera sartzen direnean?

-Zer nolako garrantzia ematen zaio munduan sexuari?

Herrialdearen arabera asko aldatzen da sexuari ematen zaion garrantzia. Greziarren %80k uste du garrantzitsua edo oso garrantzitsua dela, baita, poloniarren eta brasildarren %79k ere. Espainiar Estatuan %67rentzat da inportantea sexua. Zerrenda honetako azken lekuan japoniarrak eta tailandiarrak azaltzen dira. Bi herrialde hauetan biztanleriaren %38k soilik ematen dio garrantzia sexuari.

-Zein da sexu harreman gehien dituen herrialdea?

Kasu honetan ere greziarrak dira zerrendako lehen tokian kokatzen direnak. Urtean, batez beste, 164 aldiz praktikatzen dute sexua hauek. Brasildarrek bigarren lekua betetzen dute, espainiar Estatuan, berriz, 110ean kokatzen da urteko batez besteko sexu harreman kopurua eta Japonian urtean 48 aldiz praktikatzen dute sexua.

-Zenbat denbora ematen dugu sexua praktikatzen?

Nigeriarrak dira sexu harreman luzeenak dituztenak (24 minutu inguru). Honen atzetik kokatzen dira greziarrak, eta indiarrak dira azkarrenak (13,6 minutu).

-Non hitz egiten da gehien sexuari buruz?

Mexikon dira irekienak sexuari buruz hitz egiteko orduan. Greziarrek ere erraz hitz egiten dute gai honi buruz eta Japonian, berriro ere, atzean geratzen dira. Badirudi bertan tabua dela sexuari buruz jardutea. Hain zuzen ere, galdekatuen %21k soilik adierazten dio bere bikoteari sexuan zer nahi duen eta zer ez.

Eta zuk nola bizi duzu sexua?