Brandon Chicovsky oso gazte geratu zen burusoil, eta orduz geroztik egoera horri etekina nola atera pentsatzen aritu da. “Burusoila izatea ez da nire aukera izan, eta, ondorioz, zerbait modernoa eta onuragarria egitea erabaki dut”, esan du Chicovskyk.
Gauzak horrela, Texaseko gazteak Bald Logo enpresa martxan jarri du eta lehen egunetik hainbat enpresen proposamenak jaso ditu euren logoak Chicovskyren edo bere lankideen buruan ikusteko irrikan. Momentuz, Bald Logon hiru burusoilek egiten dute lan, baina etorkizunean langile gehiago izateko asmoa du, negozioa gainontzeko estatuetara eta hirietara hedatzeko.
Enpresen logoak burusoilen buruan tatuatu egiten dituzte, baina, noski, behin behineko tatuajeak dira, eguraldiaren edozein egoerara egokituta. Behin logoa tatuatuta, burusoilek egunean sei ordu ibiltzen dira Austin hiritik paseoan. Gainera, arreta handiagoa eskuratzeko, kamera batekin eta bi modelo ederrekin batera joaten dira kaletik.