Kirol berriak

Giroa ustekabeko nabarmenik gabe hasi da. Albiste ona da, ez bailitzateke onuragarria hasi bezain azkar faboritoren bat jokoz kanpo egotea. Dena normaltasunaren mugak errespetatuz gertatu da.

HTC taldeak irabazi du. Ez da berria, antzeko distantzian 2009an ere gailendu ziren-eta. Faboritoen artean Vincenzo Nibali izan da onena eta hori ere normala da Liquigas ondo ibili zalea baita era hontako probetan. Ez da erraza hori azaltzea, baina hala da. Banan bana hartuz gero ezin esan daiteke erlojupeko espezialista onik dutenik, baina kontua da talde homogeneoa dela eta horrek balio du taldekako lanetan eurek iaz eta 2007an erakutsi moduan. Horrelakoetan katearen zatirik ahulenak erakusten du kate osoaren sendotasuna. Hori bai Nibali ere ez dago kriskitinak jotzeko moduan, apenas lortu baitu alderik beste faboritoekiko. Bi segundo atera dizkio Michele Scarponiri, 8 Alberto Contadorri, 28 Roman Kreuzigerri, 31 Denis Menchovi, 42 Joaquin Rodriguezi eta 51 Igor Antoni. Ohi bezala Euskatel izan da talderik txarrena.

Horrek ere arreta ematen du. Euskaltelgo ziklistak ez dira Androniko edota Colnagoko eskalatzaile kuadrila baino ahulagoak holako probetarako, baina haiek emaitza hobeak lortzen dituzte. Nik uste etsita abiatzen direla euskaldunak eta horrela ezinezkoa da norberak duen maila ere ematea. Hala ere atera beharreko ondorioa da galdutako denbora ez dela, oraindik, kezkatzeko. Izan zitekeen okerragoa.