Pazko Asteko ostiralean zine karteldegiek ez dute hutsik egin eta estreinaldi berriekin bete dira ostiralero legez.
Hasteko, iaz, Donostiako azkeneko Zinemaldian Urrezko Maskorra irabazi zuen pelikula: City of life and Death (bizitza eta heriotzaren hiria) iritsi da.
Drama eta guda-thrillerra uztertzen dituen pelikula da. Zuri beltzean errodatutakoa, eta dialogo gutxi dituena… Denboran atzera egin eta 1937. urtean, tropa japoniarren erasoari aurre egin ezinik dagoen Txina birrinduan kokatzen gaitu Lu Chuan zuzendari txinatarrak. Beijing eta Shangai dagoeneko erori dira Tokioren menpe… Nanking hirianberriz, bada amore ematen ez duen herritar talde bat.
Lu generalak bere soldaduei borrokatzeko ohorea barneratzen saiatzen da… Tang familia burua, berriz, lurrazpiko aterpe batean ezagutuko dugu, Nazioarteko Segurtasun Indarren babespean.. Eta lubakiaren beste aldean, Kadokawa soldadu japoniar malenkoniatsuaren begien bitartez ikusiko dugu gudaren ankerkeria…
Five minits of heaven (cinco minutos de gloria). Asteko bigarren filmak ere indarkeria oinarri duen gatazka bat du oinarri, Ipar Irlandakoa, hain zuzen ere. Hau ere Donostian izan genuen ikusgai irailean: Zabaltegi Sailean. Olivier Hirsbiegel zuzendariaren eskutik dator eta eskarmentudun aktore bat ikusiko dugu protagonista paperean:Liam Neeson.
1975a, Ipar Irlandan IRA taldeak sekula baino indar handiagoa du. Odol egarri den gaztetxo errepublikar talde bateko kideek 16 urteko beste gazte katoliko bat hiltzen dute, 11 urteko bere anaiaren aurrean.
30 urte pasa dira eta Ipar Irlanda Bake Prozesuan murgilduta dagoen garaian, aurrez aurre kamera baten aurrean topo egingo dute hiltzaileak eta biktimaren senitartekoek. Adiskidetzea aldarrikatzen duen telebista saio batek gonbidatu ditu biak baina iraganeko zauriak ez daude uste bezain ahaztuak eta hilketaren lekuko izan zen mutikoa mendeku gosez hazi den heldua bihurtu da.
Oso bestelako filma da, berriz, The boys are back (Sólo ellos) izeneko familia-drama; alargundutako gizon batek bizitzan aurrera nola egiten duen erakusten diguna.
Mutilak soilik, horixe da, hain zuzen ere, Joe War kirol-kazetariak bere emaztea istripuz hil ostean bere eguneroko bizitzan izango duen familia giroa.
Sei urteko semea berak bakarrik hazi eta hezi beharko du, baita aurreko emazte batekin izandako 16 urteko nerabe gatazkatsua ere -berarekin aldi baterako bizitzera datorrena-. Protagonista paperean, Clive Owen aktore ezaguna.
Bizitzak ematen dituen danbatekoen aurrean, barne-borrokak gainditu eta aurrera egin behar dute, berriz, La isla interior filmeko protagonistek. Dunia Ayuso eta Felix Sabroso zuzendarien lanak Gracia, Martín eta Coral anaia-arrebak ezagutzera garamatza. Sekula ez dute anaitasun harreman handirik izan, nork bere bidea hartu du bizitzan, eta bakoitzak bere beldur eta mamuei egin beharko die aurre.
Irla isolatuak dira Candela Peña, Alberto San Juan eta Cristina Marcos inkomunikazioaren itsasoan galduta. Marcosek Parisa joan nahi du bizitzera, iraganeko bizitzatik ihes egin nahian; Graciak errealitate irreal batean hartu du babes eta Coral, aldiz, besteen maitasuna jasotzeko gose da. Hiru anaia-arreben bizitzako lerro paraleloak, ordea, aita ezustean hiltzean elkartuko dira. Aurrez aurre jarriko ditu patuak eta norberak bere beldurrak gainditzeko aukera ere emangodie bizitzak, orain arte irla bakartiak izan direnen arteko loturak eraikitzekoa, alegia.
Azkenik, hurrengo filma aurkezterakoan, 180 graduko bira emango dugu, endreduzko komedia amerikarra baita: The bounty hunter (Exposados).
Hasteko aipagarria, protagonistaren nortasuna. Friends telesailean izar bihurtu eta Brad Pitten bikotekide izan ostean are ezagunagoa egin zen Jennifer Aniston da bata eta Gerard Butler da pantailan erreplika ematen dion bikotekidea komedia zoro honetan.
Argumentuari dagokionez, berriz, hauxe: Ihes egindako gaizkileak topatu eta poliziaren esku uzterakoan jasotzen duen diru-sariarekin bapo bizi da Milo Boyd. Helarazi dioten azken helburua, ordea, ez da aurrekoak bezain erraza izango: Nikole Hurley bere emazte ohia aurkitu beharko du. Hilketa bat ikertzen ari zela atxilotu eta baldintzapeko askatasuna urratu duen kazetari ipurterrea da Nikole.
Ezkonduta egon ziren garaian bezalaxe, batek besteari aurre hartu eta norgehiagoka sortu da harreman “berri” honetan ere, baina jolasa arriskutsu bihurtuko da euren bizitzak arriskuan ikusten dituzten unetik aurrera. Orduan, nahi ala nahi ez, ados jarri eta elkarrekin ihes egitea beste irtenbiderik ez dute izango.
Hauxe bada, apirilaren 9ko film berrien zerrenda. Joango al zara zinemara? Utzi hemen zure iritzia!!!
Zinemaldiko filmak, Clive Owen eta Jennifer Aniston, estreinaldien arteko lehian http://bit.ly/8XFRee
Jennifer Aniston oso ona do, baina, en fin, pelikula hoi e nuke patuta re ikusiko
Pelikula guztiek dute itxura ona, ia horietako bat ikusteko aukera deten
Nik asten hontan ‘La ciudad de la vida y la muerte’ pelikula ikusteko aukera izan det, Donostiako Zinemaldia irabazi zuna, ta gustau zait. Ezta gerrako pelikula tipiko hoitako bat. Oso gogorra benetan emakume eta errefuxiatuen ikuspegia. Barrua mugitzen du.