Nikolas txikia mutiko xalo eta dibertigarria da. Sempe eta Goscinny marrazkilari eta gidoilariak sorturiko ume txiki horren istorioak ia hizkuntza guztietara itzuli dira. 2009. urte honetan 50. urte beteko ditu Nikolas txikiak eta urteurrena behar bezala ospatzeko argitaratu gabeko zenbait ipuin kaleratu dira frantsesez, Pariseko Hôtel de Villen erakusketa bat ipini dute eta orain Nikolas txikiren abenturak ardatz hartuta filma egin dute.

Filma Semperen eta Goscinnyren liburuetan oinarrituta dago. Laurent Tirardek zuzendu du Belgikaren eta Frantziaren arteko produkzioa. Nicolas gurasoekin gustura bizi den mutiko bat da. Haur guztiak bezala, asko maite dute bere gurasoek, lagun jatorrak ditu eta asko gustatzen zaio jolastea. Egun batean, amak beste haur bat izango duela jakiten du eta galdera bat etortzen zaio burura: zer egin dezake bere gurasoak berataz “ahaztu” ez daitezen? Zer egin dezake “ezinbesteko” bihurtzeko?

Momentuz Iparraldean estreinatu da Nikolas txikiren filma, baina ez dakigu aipaturiko filma Hegoaldeko zinema-aretoetara helduko den ala ez. Beraz, haurtzarora jauzi egin eta Nikolas txikiren abenturekin gozatu nahi baduzu, zeharkatu muga.