Gatibuko Alex Sarduiri elkarrizketa egiteko deitu nionean, disko berria grabatzen ari zirela eta oso lanpetuta zebilela esan zidan. Hurrengo astean hitz egiteko lotu ginen. Nik estudioan bertan grabatu nahi nituen eta elkarrizketa grabazioen irudiekin uztartuz bideo bat egin, baina ezin zuen eta, beraz, ez genuen egin. Betiko moduan, ez duzu egiten nahi duzuna, ahal duzuna baizik, eta muga horrekin, ahalik eta hoberen egiten saiatzen zara.

Solasaldia atsegina izan zen, baina dena euskara batura pasatu behar izan nuen, berak esan bezala idazten badut… Ezkondu behar zela eta berriz ere aita izango zela esan zidaten, baina elkarrizketan ez nion ezkontzagatik zuzenean galdetu nahi. Hala ere, amaieran, agurtzerakoan, zorionak esan nion, umeagatik eta ezkontzagatik, eta orduan horren inguruan hitz egiten hasi zen. Ezkontzen zen lehendabiziko aldia zela esan zidan, nahiz eta bost urteko semea izan, eta oraingo neskarekin umea izatea erabaki zutela eta, gero, lehendabizi ezkontzea hobe izango zutela pentsatu zuten, baina erabaki hori hartu zutenerako neska haurdun zegoen eta azkenean, dena batera. Esan zidanez, berak neskatoa nahi du. Galdetu nion ea zelan moldatzen zen Mungian bizitzen, Muxikakoa izanik, eta pozik zegoela esan zidan, mugitzeko erosoa zela. Oso pozik sumatu nuen. Disko berria, haur berria, etxe berria, bizitza berria…

Egun batzuk igaro eta Alex eta bere etxeko batzuk onddoekin intoxikatu zirela jakin nuen. Ezkontza bertan behera geratuko zela ematen zuen, baina ez. “Arratsaldero” saioan ikusi ahal izan genuen ezkondu baino bi egun lehenago, guztiz sendatuta. Ea enteratzen naizen zelan joan zen ospakizuna… Hemen duzue ETB1en egin zioten elkarrizketa.