1966ko urriaren 29an, Question Mark & The Mysterians taldeak Estatu Batuetako single salduenen gailurra eskuratu zuen euren estreinako singlearekin:”96 tears”. Une hartantxe, Michigan-eko talde hau 60ko hamarkada osoko garage rock talde garrantzitsuenetako bat bihurtu zen.

Talde honetako kideak Michigan-en bizi baziren ere, guztiak Texas-en jaioak ziren eta mexikar sustraidun familietatik zetozen. Taldeko abeslari nagusia eta konposatzaile aipagarriena, ere, Rudy Martínez izeneko gazte bitxi eta misteriotsu bat zen, guztiek Question Mark goitizenaz ezagutzen zutena. Pertsonai xelebre xamar honek Martetik etorritako alien bat izatearen ustea omen zuen eta inoiz ez zen eguzkitarako betaurreko ilunik gabe ateratzen eszenatokira. Horrenbesteko txoro punttua zuen, taldeak Cameo Parker diskoetxearekin zinatu zuela, zigiluaren logoaren kolorea laranja zelako eta hau zelako, ere, Question Mark (?) jaunaren kolore kuttunena.

1966an argia ikusi zuenetik “96 tears” kantak hainbat eta hainbat moldapen izan ditu eta nabarmentzekoa da, dagoen bertsio kopuru handia eta moldapen hauen aniztasuna; soul eta funk ukituko moldapenetatik, punk rock eta hardcore taldeek egindako moldapenetara. Bakarren bat aipatzekotan, 1990ean Stranglers taldeak egindakoa aipatuko genuke, bertsio honek Erresuma Batuko pop arrakasten zerrendako 17.postua eskuratu baitzuen.