1973eko urriaren 27an, Gladys Knight & The Pips taldearen "Midnight Train To Georgia" ageri zen Estatu Batuetako single salduenen zerrendako lehen postuan . Hau izan zen Gladys Knight abeslariaren taldeak pop zerrenda amerikarren gailurra eskuratzen zuen lehen aldia. VeeJay eta Motown diskoetxeetan egon ziren sasoian hainbat arrakasta txiki lortu zituzten arren, ordu arte ez zuten tamaina honetako arrakastarik lortu.

Jim Weatherly-k konposatutako kanta hau  "Midnigth Plane To Houston" izeneko abesti batetan oinarritzen da. Singlea, Tony Camillo-k ekoiztu zuen eta Buddah zigiluak argitaratu; ondoren, Imagination izeneko LP-an jaso zen kanta. Disko hau, ere, oihartzun nabarmenekoa izan zen eta besteak beste, "Best thing that ever Happened To Me" single arrakastatsuarekin gogoratzen da. 

"Midnight Train To Georgia" Gladys Knight abeslariaren ibilbide osoko izenburu arrakastatsuena izan zen eta 1973ko single entzunenetako bat.