Arratsaldero: Agur eta ohore!

Langabezian geratuko ez den taldekide bakanetakoa naiz, beraz esan ahal dut esatera noana, inolako susmorik gabe. Alegia, bestela balitz, langabetu berri baten purrusta edo kasketa irudi lezakeela honek, baina ez da halakorik. Aldez aurretik, hori bai, bihartik aurrera lanik izango ez duten lankide eta lagun guztiei besarkada estu eta muxu handi bana.

la foto

Saioak iraun duen urte t´erdi honetan, krisia izan dugu bolo bolo eguna joan eguna etorri. Haren gaineko gaiak izan dira nagusi gurean, nik uste. Eta hara non, krisiaren biktima omen gu ere.  ETB1erako diru nahikorik ez nonbait, eta Arratsaldero itxi egingo dute. Nik esango nuke, etxe gehientsuenetan, bakarren batek diru arazoak dituenean, anai aberatsak ematen diola dirua pobreari, baina gurean alderantziz: anai pobrea, pobreago. Pobre izan bait gara beti. Merke zuhurrean ibili gara hasi eta bukatura arte. Horrek bi ondorio nagusi izan ditu: tartarrean bete behar izan ditugu bost ordu, batetik. Horrek, saioa nahi baino aspergarri eta motelago bihurtu izan du batzuetan. Hori laiotzean. Eguteran, aldiz, gaia intereseko duen ikusleak behintzat, beste inon ez bezelako patxadaz entzun ahal izan dituela haren gainekoak.  Eta zuzenean entzun ditu gainera. Zuzenekoa eta frexkoa izan da jarduna. Aurrerantzean, enlatatutako euskera entzungo du ikusle horrek berak. Enlatatua eta txukuna, zuzena, egokia. Eta horretatik ere behar du, jakina, euskeraren normalizazioak. Baina bapatekotik ere bai, eta halakorik ez du izango aukeran. Bestetik, ahalik eta gutxien gastatze aldera, Bilbo handian ibili behar izan dugu gehienetan. Eta zorionez, uste ustelak gezurtatu ahal izan ditugu: Sestaon, Barakaldon, ezkerraldean…, inkesta bat euskeraz egin daitekeela erakutsi dugu, eta hori poztekoa da noski! Baina ez da bilatutako zerbait izan. Gazia gozo bihurtu da, baina sorburua, kontu horrek gazia zuen: merke zuhurrean ibili gara. Legebiltzarrean bertan erakutsi dute gure aurrekontua, eta anai aberatsenaren erdia zela guztiok dakigu, iraupenez eta lanez bikoitza zena egiteko. Eta hori, ETB1en apustu sendoa ginenik… Nik dakidala, pilotalekuan, tartean dirurik gehien duena da apustu potoloa. Eta apustuak, batzuetan irabazi egiten dira, eta besteetan galdu, eta oraingoan guztiok galdu dugu, baina bereziki ETB-1en proiektuan sinisten dugunok galdu dugu.

Esanguratsua iruditu zitzaidan atzo Berriak Arratsalderoren amaieraren berria laguntzeko jarritako argazkia. Saioaren aurkezpenean duela urte t´erdi ateratako argazkia zen. Ez foto horretan aurkezleak bereziki guapo agertzen zirelako (beti dira guapoak biak!), ETBk beste argazki edo promozio ekintzarik egin ez diolako saioari iraun duen urte t´erdian.. Lastima. Bide zaila zela bagenekien hasiera hasieratik, eta horregatik heldu genion erronkari hain gogotsu. Bai batzuk behintzat. Bidea ez da amaitu, hasi baino ez da egin. Guk lurra atxurtu dugu. Etorkizunean beste talde bat etorriko da, eta asfaltatuko du. Arratsaldero, saio bat baino gehiago izan bait da: orain arte ETB-1en jorratu gabeko ordutegi eta aktualitate formatu baten aldeko hautua. Eta hori beti izango du beharrezko telebista kate osatu batek. Inoiz amaitzen ez den lana da hori. Itsasontzia ez da portura iritsiko, ez bait da hori helmuga. Itsasoa zeharkatu, bertako bizipenak eta bertan ikusitako kontatzeko. Hori da helburua. Baina bidea egiteko, marinelak ez ezik patroiak ere behar ditu txalupak, noraezean itzulika ibiltzeko arriskua bait du bestela. Eta hortxe geratu gara, ez atzera ez aurrera.

Ez gara ez lehenak, ez azkenak, tamalez. Bai, badakit. Ingurura begiratu baino ez dago: beste hainbat dira kinka larrian dauden proiektuak, UEU dela, Nafarroako Antzerki Eskola dela… Baina tristeena da, guzti horiek, albistegietatik haratago ez dutela telebistan euren egoera salatzeko zirrikiturik topatuko aurrerantzean. Eta arratsaldeetan txutxumutxu eta halakoez jositako programaziotik ihesean dagoen ikusleak ez du euskerazko babesik topatuko. Solaskideek ez dute euren gogoeta non azaldu izango. Eta nik ez dut Estitxuren zeharkako begiraturik jasoko. Ezin nabarituko dut haren begi ederretan, ari zaren horrek merezi duela nabari duzunean baino ez dagoela nekea eta etsipena gainditzerik. Ezin esango diot, minak min, honek merezi duenik.

la foto(2)

Atzo Esne Beltza izan zen gurean. Bai, tarteka halako harribitxiak ere izan ditugu. Ordu luzeetako jardunean bazelako aspergarritik bezainbeste entretenigarritik. Izenburua bera hausnartzen baino denbora gehiago eman diogulako izenari izana eman nahirik. Iritzi asko bildu ditugu, kalean kontrako ustea den arren, kolore desberdinak izan dituelako gure arratsalderoko ortzadarrak. Eta gonbidatu garrantzitsu eta ilustreak ere izan ditugu sarri xamar. Azkenetakoa, esan bezela, Xabi Solano eta banda. Badakizue zein kantu eskeini zuten? “Nahi dut”. Euskeraz bizi nahi dut… Ba hori, nik ere euskeraz bizi nahi dut. Egunero. Arratsaldero.

5 thoughts on “Arratsaldero: Agur eta ohore!

  1. Mikel

    Hain egoki esan duzunari ezer berririk gehitzerik ez dudan arren, euskaraz mintzo garenok maiz bizi behar izaten dugun egoerari aurre egiteko neure aletxoa jarri nahi nuke, alegia, iritzi eta ideia ale bikainak sortzeko gai izan ohi gara, baina kopuruaren, masaren indar olatuzkoa erdiesterik ez dugula izaten.
    Hara bada zure hitzak neuretzat hartuta bakarlariari abesbatz lagungarria osatzen lagundu nahi nioke, izan ere, bihar amaitzekoa den saio horrek leiho berri bat eskaintzen zion gure hizkuntzari, unean unean sortzen zena. Gure tresnaren ahoa berritzen, nahasten, bihurtzen, makesten eta aldi berean zorrozten egindako ahaleginak merezi luke jarraipena… zer eskainiko ote digute orain Montrealeko latako barre-festa horien segidak, goizean errepikatutako iragan gaueko berrepikapenak… Ez dakit merkeagoak diren, baina itxura halakoxea dute egia esan.
    Zorionak egindako ahaleginean dagokizunagatik (gogoan dut, bide batez, “Bi errepidean” saio freskagarria aurkeztu eta zuzendu zenuen aldia ere) eta eskerrik asko ahotsa jasota berdin pentsatzen dugunoi ahuspoa emateagatik.
    Eutsi horri!

    Reply
    1. Urko Aristi Post author

      Eskerrik asko, Mikel! Estimatuta dago! Bai noski… Arrazoi duzu bakarlari-taldekide bikotomiaren gainean. Taldean ari denak errezago izaten du bozgorailura arteko bidea, baina era berean, melodia aberastuko bada, bakarlari askok jarritako ñabardurari esker izango da. Are gehiago esango nuke: Askotan jendea bakarlari gisa aritzera behartu dugu, zerbaiten bozeramale bihurtuz.. Halako gaiaren gainean arituko den hiztuna behar dut, eta besterik ez dudanez, zerorrek egin beharko zenuke.. Eta hori zilegi da, noski, eta beharrezko, hainbesteko jarduna beteko bada. Baina argudioa egin zait askotan mingarri: jendeari militantzia eskatu diogu (zu ezean ez dut honen gainean ariko den beste euskal hiztunik topatuko, euskeraren alde ari gara, euskalzale zaren einean egin beharko zenuke, gogo txarrez bada ere…), gero guk gerorrek, gure etxean, militantzi gutxi erakutsi dugunean. Eta militantzia debaldekoaren eufemismo modura erabiltzen dugunean, zer esanik ez!

      Reply
  2. Auxkalo

    Erraza da hitz egitea zuk kontratu fijo bat duzunean. Ez dizut ezer txarrik opa baina kazetaritza,ikusentzute edo beste karrera bat ikasten dutenek hoba zu bezalako suertea izango balute.

    Reply
    1. Urko Aristi Post author

      Nik ere guztiei zorterik hoberena opa diet, baina ez nirearen pareko, Auxkalo, nirea baino hobea opa diet, hanka sartu bait duzu, lagun. Nik ez dut kontratu fijorik. Eta zin dagizut zuk ahotan duzun prekarietatea eta lan baldintzak zuk uste baino hobeto ezagutzen ditudala. Gurean langile bezainbeste lan egoera desberdin dago, eta aurriritzietan oinarrituta guztiak zaku berean sartzea ez da bidezkoa. Ez fijorik ez behin behinekorik… ez dut inolako kontraturik nik. Autonomo naiz, beraz pentsa…

      Reply
  3. Pedro

    Hau bai pena galanta! Nire partetik zorterik onena opa dizuet etorkizunean, lana bikain egiten duzuelako, EUSKARAZ, eta gu ikuslego garenok gustora sentiarazten diguzuelako zuen jardunarekin, eztabaidekin…

    Guk erabakitzen dugu nor sartu gure saloietan eta nirean behintzat beti izango da zuentzat tokia, beraz, ez etsi eta segi aurrera horretan badaukagu eta eskarmentua.

    Eta zuri Urko, langabezian geratzen ez zaren hori, eskerrak ere eman beharrean sentitzen naiz. Adorea ikusten zaizu gauza piloa idazten ausartzen zarelako eta ea noiz ikusten zaitugun berriro beste saioren batean eguraldiaz aparte ze zure jarduna oso baliotsua baita, beti lortzen baituzu gauza guztiak ongi eta garbi azaltzen.

    Reply

Leave a Reply to Auxkalo Cancel reply

Your email address will not be published. Required fields are marked *