Author Archives: blogs eitb

Auzolanean osatutako bertsoak

Unai Muñoa eta Ane Labaka izan dira Hitzetik Hortzerako platoan asteon. Ttakun euskara elkarteak koordinatuta, urtero egiten dute bertso-saio berezia Lasarteko Manuel Lekuona kultur etxean. Herriko kultur taldeek elkarlanean ontzen dute ikuskizuna, eta denetarik izaten da: dantza, antzerkia, musika… eta, jakina, bertsoa. Aurten, Maialen Lujanbio eta Andoni Egañarekin kantatu dute, eta hango berri emango dute platoan Labakak eta Muñoak. Hori eta asko gehiago, Hitzetik Hortzeran. Horra:

Belfasteko Bertso Dinneretik bueltan, Alaia Martin kontu kontari

Egin berri dute Belfasten Bertso Dinnera bosgarrenez. Han izan dira kantuan Alaia Martin eta Jon Maia. Aurten, gainera, harrera ofiziala egin die bertsolariei Belfasteko alkateak berak. Hango berri eman du Martinek, baita hezkuntza arautuan ematen dituen bertsolaritza eskolez ere. Hori eta askoz gehiago Hitzetik Hortzeran:

Herrialdeetako Eskolarteko Bertsolari Txapelketak, abian

Herrialdeetako Eskolarteko Bertsolari Txapelketak jada martxan dira. Idatzizko sariketatan zein bat-bateko saioetan parte hartzeko aukera izango dute haur eta gaztetxoek. Adinaren arabera bi maila izango dira: 14 urtera artekoak eta 14-18 urte bitartekoak. Egutegia ikusteko egin klik agendan.

Arabako Eskolarteko Bertsolari Txapelketa 2010

Arabako Eskolarteko Bertsolari Txapelketa 2010

Eskolarteko Txapelketaren bitartez ikastetxeetan eta bertso-eskoletan bertsolaritza lantzen duten gaztetxoek bertso saioak ikusi, idatzizkoan parte hartu eta jendaurrean abesteko aukera izango dute.

Ikastolen Elkarteak eta Bertsozale Elkarteak elkarlanean antolatutako ekimen hau oso modu ezberdinean garatu da orain arte eskualde zein herrialde bakoitzean. Txapelketaren egitura bateratu asmoz, 2013rako Eskolarteko Txapelketa eredu berria jarri nahi da martxan, besteak beste bertso-eskolei parte hartzeko aukera emanez. Hori dela eta, eskolarteko txapelketaren inguruko gogoeta eguna antolatu dugu maiatzaren 12rako, Villabonako egoitzan. Parte hartzeko interesa duzuen guztiok ateak zabal zabalik dituzue.

Galtxagorri robotarekin kontu kontari

EHUren Gipuzkoako Campusean egindako bertso saio berezian, Ttartalo eta Galtxagorri robot bertsolariak aurkeztu dituzte jendaurrean. Euren lehenengo plazan bertsolagun izan dituzte Andoni Egaña, Felix Zubia, Oier Lakuntza eta Maialen Velarde. Bertan gai-jartzen aritu zen Aitzol Astigarraga eta berau izan du gonbidatu asteon Jon Artanok.

Petra Elser, Frankfurteko euskaldunarekin bertsolaritzaz

Osinalde sariketatik entresaka mamitsua egin du Hitzetik Hortzerak, Petra Elser Frankfurteko euskaldunarekin kontu kontari egon diren bitartean. Gabiriako gazteek BertsoMovieDa lehiaketarako sortutako Bertso Road Movie ikusentzunezkoaren laburpena ere eman dute programan. Horretaz gain, Oñatiko Santa Ana aretoan egin zen saiotik Uxue Alberdik eta Alaia Martinek egindako ofizioa eta Bergaran, Erramu Zapatu bezperako saiotik Amets Arzallus eta Andoni Egaña elkarri puntu jartzen. Horra:

‘Beste larogei urtian’ dokumentala Hitzetik Hortzeran

Euskal Herriko Bertsozale Elkarteak 25 urte beteko ditu 2012an. Sortu zenetik egindako ibilbidea aztertu eta landu ondoren, ‘Beste larogei urtian’ izeneko liburu eta DVDan bildu dute emaitza. Hitzetik Hortzeran erakutsi dituzte dokumentalaren xehetasunak.

Mungiako bertso afaria, Miren Ibarluzeak maneatuta

Beñat Ugartetxeak hasieratik bertatik ekin zion Igor Elortza tentatzeari Mungiako Erreka jatetxean egindako bertso afarian. Hasieran librean eta gero Taket Bertso Eskolako kideek emandako gaiei kantatuz lortu zuten bertan bildutakoei afaloste ederra pasaraztea. Batik bat Ugartetxea Lazkao Txikiren paperetik Elortzari galdezka jarri zutenean. Joxe Migelen ahots hauskorra ondo estudiatua duela frogatu zuen Ugartetxeak. Benetakoaren eta imitatzailearen arteko aldea zenbatekoa den neurtzeko Lazkao Txiki zenaren ale bikain batzuk erakutsiko dituzte Zappingean. Zuri-beltzekoan, berriz Arozamena tabakoari kantari. Hori guztia eta gehiago aste honetako Hitzetik Hortzeran. Horra:

Bilboko Alondegiko saio esperimentala Hitzetik Hortzeran

Unai Elizasuk eta Asier Altunak ezohiko bertso jarduna eginarazi zieten Bilbon, Alondigan, Maialen Lujanbio, Igor Elortza eta Aitor Mendiluzeri, bertsotarako gaiak bideoz (ikus-entzunezko pieza laburretan) emanaz, inolako azalpen gehigarririk gabe. Saio horretakoak eta Iturengo inauterien akabaila izan ohi den kontu eguneko bertso bazkarikoak izango dira asteon Hitzetik Hortzerako lehengaia. Iturengo ostatuan, elur bisutsetik epelean, ikaragarrizko giroa sortu zen, Julio Soto eta Andoni Egañaren kantuari eta iturendarren bertso goseari eskerrak.

Saio horiek emandakoaz, Bardoak 2012 Nafarroako Bertsozale Elkarteak antolatutako taldekako txapelketaz eta beste hainbat kontuz aritu da platoan Estitxu Fernandez Maritxalar psikologo eta kazetari lesakarra.

Jesus Egiguren Hitzetik Hortzeran

PSEeko presidente Jesus Egiguren Imaz izango da asteko gonbidatua Hitzetik Hortzeran. Ume-umetatik dela bertsozalea eta Bilintx protagonista duen nobela bat idatzia duela kontatu dio, besteak beste, Jon Artano Izeta aurkezleari. Alberto Surio EITBko zuzendariarekin izan berri duen solasaldiko pasarte bakarren bat ere kontatu du. Besteak beste, ETBk gaztelerazko kateak kendu eta euskarazko kalitatezko kate bakarra izan beharko lukeela esan ei zion. Entzun, entzun … Egigurenen hitzak:

Programako eduki nagusiak Bertso Eguneko afalosteko saioetatik eta Txolarre Irratiak Tolosan antolatutako jaialditik ateratakoak dira. Zuri-beltzekoan Basarri naufragoari kantari 1968an Piensos Onenak antolatutako sariketa entzutetsutik; eta zappingean Mitxelena eta Mañukortaren arteko pisuzko ofizioa 1987ko Bertsolari Egunetik aterata.